(1973, Zarautz). Ilustratzaile eta diseinatzaile grafikoa. Publizitateko Diseinu Grafikoa ikasi zuen (2011), eta hainbat ilustrazio-tailerretan trebatu zen egile ezagunekin; esaterako, Javier Zabala, Isidro Ferrer, Elena Odriozola, Katsumi Komagata, Jesús Cisneros, Icinori, Ignasi Blanch eta Guridi.

Argitaletxeen eta publizitatearen munduan egiten du lan batez ere. Euskarri ugaritarako egiten ditu ilustrazioak; esaterako, kartelak, skate-oholak, erakusleihoak, diskoen azalak, arropa eta osagarriak. Gainera, ilustrazio esperimentaleko tailerrak ematen ditu haurrentzat, eta hainbat erakusketa indibidual eta kolektibo egin ditu.

Illarramendiren sorkuntza-unibertsoa naturako, itsasoko eta euskal sustraiekin erlazionatutako elementuek osatzen dute. Orbanetik eta lerrotik abiatzen da beti, eta gama kromatiko murriztu bat erabiltzea gustatzen zaio. Dioenez, haren ilustrazioak “geometrikoak eta delikatuak” dira, eta teknika mistoak, analogikoak eta digitalak erabiliz egiten dira; lettering-ak ere badu tokia.